GLIKO SHALQIRI     (2 mënyra)

Shalqiri është fruti që na shoqëron përgjatë stinës së verës. Përmban shumë vitamina e minerale dhe mund të themi që nuk mund të kalojmë verën pa shijuar këtë frut. Zakonisht lëkurat e shalqirit i hedhim, por me to fare mirë mund të gatuajmë një ëmbëlsirë të shijshme siç është glikoja. 

Përbërësit:

- 1 kg lëkurë shalqiri
- 2 shkopa vanilie
- 2 limona
- 1 kg sheqer

Përgatitja:

Për të përfituar një reçel shalqiri sa më të mirë, së pari ju duhet një shalqi me lëkurë të trashë, pasi ky reçel bëhet vetëm me të bardhën e lëkurës së shalqirit.

Pasi të qëroni pjesën e jashtme jeshile të tij, priteni pjesën e bardhë në copa 1 centimetër të trashë.

Futini copat e shalqirit në tenxhere dhe ziejini për 10 minuta.

Ndërroni ujin e nxehtë me ujë të ftohtë dhe ziejini përsëri për 10 minuta.

Pastaj futni copat në tenxhere me ujë të ftohtë dhe i ndërroni ujin 6 – 8 herë për 24 orë.

Për një kilogram shalqi duhen 1 kilogram sheqer kaf, ose sipas dëshirës. Në tenxhere hidhet sheqeri dhe ujë sa të mbulojë nivelin e sheqerit.

Ziejeni deri sa të keni shërbetin e trashë e pastaj hidhen copat e shalqinit.

Më pas shtohet edhe vanilja dhe 2 limonat e shtrydhur. Ziejeni edhe për 20 minuta dhe fikeni zjarrin.

Hiqni shkumën dhe mbuloni tenxheren me napë deri sa të ftohet.

Ruajeni në frigorifer dhe servireni të ftohtë.

Mënyra e dytë

Përbërësit:

- 1 kg lëkura shalqiri të qëruara
- 1 kg sheqer
- 1/3 lugë kafe me vanilie
- 1 limon (lëngun)

Për lëkurat e shalqirit

- 2 lugë supe me gëlqere
- 10 gota me ujë

Përgatitja:

Pasi të qëroni pjesën jeshile të jashtme të shalqirit prisni pjesën e bardhë të lëkurave në kubikë.

Tretni 2 lugët e gëlqeres në 10 gota ujë dhe hidhni në të shalqirin e prerë në kubikë.

Lereni shalqirin në ujin e gëlqeres për 2 orë dhe më pas kullojeni dhe shpëlajeni me ujë të rrjedhshëm.

Në një tenxhere hidhni pjesët e shalqirit, sheqerin dhe lerini të ziejnë në zjarr te ngadaltë.

Pasi fillon të trashet, shtoni vanilien, lëngun e limonit përziejini mirë dhe lerini edhe 7 minuta të tjera në zjarr me temperaturë të ulët.

Hiqni nga zjarri dhe lereni të ftohet plotësisht.

Vendoseni në vazo të sterilizuara.

Ju bëftë mirë!