SALLATË E FTOHTË ME PATATE DHE MAJDANOZ
SALLATË E FTOHTË ME PATATE DHE MAJDANOZ
Temperaturat e larta e largojnë paksa dëshirën e konsumimit të gatimeve të rënda dhe shumë të ngrohta.
Të gjithë kthejnë sytë nga sallatrat dhe kombinimet e ftohta të perimeve gjatë verës.
Prandaj në këtë recetë ju këshillojmë të provoni një sallatë të re me patate, majdanoz dhe ullinj.
Sallata me patate të ziera të marinuara nuk është shija tipike tradicionale, por ju sigurojmë se do të kthehet në të preferuarën tuaj.
E shijshme për t’u ngrënë dhe mund të zëvendësojë një vakt të plotë pasi është e mbushur me vitamina dhe vlera.
Përbërësit:
- 800 gr patate
- 100 gr ullinj jeshilë
- 2 lugë gjelle limon
- 1 tufë majdanoz
- vaj ulliri
- kripë
- piper i zi ose i kuq
Përgatitja:
Fillimisht qëroni lëkurën e patateve dhe i lani ato me ujë të bollshëm.
Më pas pritini në copa të vogla katrore ose në feta dhe vërini në një tenxhere të mbushur me ujë.
Lërini të ziejnë në zjarr të mesëm për të paktën 20 minuta.
Me majën e një thike kontrolloni nëse patatet tuaja janë zier plotësisht.
Nëse maja e thikës futet me lehtësi në zemër të patateve atëherë ato janë gati.
Fiksni zjarrin dhe vendosini patatet në një enë të ftohen, më pas mund të vazhdoni me përgatitjen e tyre.
Shtoni tek patatet, ullinjtë të cilët mund t’i zgjidhni me ose pa fara sipas dëshirës dhe 2 lugë lëng limoni të freskët.
Hidhni vajin e ullirit, të paktën dy lugë gjelle dhe ndërkohë grini hollë majdanozin të cilin hidheni në fund bashkë me kripën dhe piperin.
Përziejini mirë të gjithë përbërësit derisa sallata të marrë një pamje uniforme dhe sipas dëshirës mund të shtoni edhe pak vaj ulliri.
Sallata juaj me patate është gati, mund të zgjidhni t’a konsumoni menjëherë ose t’a ruani të mbuluar në frigorifer.
Ju bëftë mirë!
TË TJERA RECETA
RECETA ËMBËLSIRASH
