TORTË E FTOHTË ME KOS DHE FRUTA

TORTË E FTOHTË ME KOS DHE FRUTA

Ëmbëlsirat janë gjithmonë një pikë kyçe e drekave festive në familje.

Ato, përveç shijes, i japin një tjetër bukuri ditës por edhe tryezës.

Kjo recetë kërkon përdorimin e xhelatinës, por nëse dëshironi mund ta shmangni përdorimin e saj.

Më pas zgjidhni frutat tuaja të preferuara me të cilat mund ta zbukuroni tortën tuaj sigurisht edhe që t’i jepni akoma edhe më shumë shije.

Përbërësit:

- 280 gr biskota pa sheqer
- 170 gr gjalpë
- 30 gr sheqer
- 700 ml kos
- 60 ml qumësht
- 50 gr sheqer pluhur
- 20 gr xhelatinë
- 300 ml pana ëmbëlsirash
- fruta sipas dëshirës


Përgatitja: 

Si fillim lyeni me gjalpë një tavë keku rrumbullake dhe shtrojeni me letër pjekjeje.

Ndërkohë grini në mikser biskotat dhe shtoni sheqerin dhe gjalpin e shkrirë dhe të ftohur.

Masën e përgatitur kalojeni tek tava dhe me një lugë përhapeni në të gjithë sipërfaqen e saj.

Mundohuni të krijoni një shtresë të njëtrajshme dhe të drejtë.

Futeni tavën në frigorifer për 30 minuta ndërkohë që vazhdoni me përgatitijen e ëmbëlsirës.

Shkrini fletat e xhelatinës tek një enë të vogël me pak ujë dhe lëreni aty për 10 minuta.

Mund ta përzieni me telin e kuzhinës që të tretet më shpejtë.

Ndërkohë në një tenxhere hidhni qumështin dhe vendoseni në zjarr për t’u ngrohur.

Kur të shihni që qumështi është i nxehtë hidhni aty xhelatinën e zbutur dhe përziejeni përsëri me telin e kuzhinës.

Në mikser rrihni panën e ëmbëlsirave me sheqerin pluhur derisa të krijoni shkumën e bardhë.

Panën përziejeni me kosin dhe qumështin me xhelatinë i cili duhet të ftohet plotësisht.

Të gjithë masën që përgatitët kalojeni tek tava ku shtruat biskotat dhe përhapeni mirë dhe në mënyrë të barabartë.

Tani  futeni ëmbëlsirën për 5 orë në frigorifer që të mpikset sa më mirë.

Para se ta shërbeni mund ta zbukuroni me fruta të freskëta të stinës.

Ju bëftë mirë!

comments powered by Disqus
Tortë e ftohtë me kos dhe fruta
TË TJERA RECETA
RECETA GATIMI
Lexoni të tjera receta
Share by: