Gjel deti i pjekur ne furre-KUZHINA.com
GJEL DETI I PJEKUR NË FURRË
Pa atë, tavolina e Vitit të Ri është e varfër. Por, përpara se të shpejtoni të blini gjelin e detit, është mirë të njihni disa ‘rregulla’ të dobishme:
Blijeni në dyqane dhe tregje që janë të kontrolluara për standardet e higjienës. Nëse blini gjel deti të freskët, kini kujdes mos të ketë shndërrime dermatologjike, mishi të mos jetë i nxirë ose në ngjyrë jeshile tek pjesa e barku, qafa, në pjesën e brendshme të kofshëve ose poshtë krahëve. Mos e zgjidhni nëse mishi në sipërfaqen e lëkurës dhe tek zgavrat e brendshme ka mbishtresë të ngjitshme (veshtullore).
Nëse e zgjidhni të ngrirë, kini kujdes të jetë i paketuar pa ajër (në vakum) dhe të ruhet në temperaturën minus 18 gradë. Për më tepër, shmanguni blerjes, nëse në pjesën e brendshme të paketimit ka copa akulli ose shumë lëngje.
Përbërësit:
- Gjel deti me peshë rreth 4 kg, pa të brendshmet
- 125 g gjalpë në temperaturën e dhomës
- 1 limon
- 1 thelb hudhër e shtypur
- 3 qepë të qëruara e të ndara përgjysmë
- vaj ulliri
- kripë
Përgatitja:
Nxeheni furrën në 180 gradë C. Thajeni gjithë gjelin e detit me peceta ose letra kuzhine.
Përzieni mirë gjalpin e zbutur me hudhrën e shtypur e lëkurën e grirë të limonit, derisa të formohet një masë. Me këtë masë lyeni gjithë pjesën nën lëkurë të gjelit të detit, duke e ngritur lëkurën mbi pjesën e mishit dhe duke e ngjeshur me dorën nën të masën e gjalpit.
Përsëri me dorë shpërhapeni mirë, derisa të keni arritur të lyeni mirë pjesët e gjoksit duke filluar nga qafa dhe më pas pjesën e kurrizit e kofshëve.
Ndajeni më katërsh limonin dhe furini këto copa brenda tij (trupit të gjelit të detit).
Lyejeni gjithë sipërfaqen e lëkurës së tij me vaj ulliri e kripë.
Vendosini gjysmat e qepëve në një tavë pjekje e mbi të vendosni gjelin e detit e mbulojeni të gjithin (bashkë me tavën) me një letër pjekje ose letër alumini, duke i dhënë kështu mbulimit pamjen e një tende.
Lëreni gjelin e detit të gatuhet për 1 orë e 40 minuta, ose për çdo gjel a pulë deti tjetër do të përllogaritni 25 minuta kohë pjekje për çdo kg peshë.
Nxirreni gjelin e detit nga furra, rriteni temperaturën e furrës në 220 gradë, hiqeni letrën e aluminit dhe lëreni gjelin të piqet edhe për 30 minuta, sa të marrë ngjyrë. Për të qenë të sigurt nëse mishi është pjekur, shpojeni diku me një shkop dhëmbësh dhe nëse lëngjet që dalin prej aty janë të qarta, atëherë mishi është pjekur.
Lëreni gjelin e pjekur të detit të rrijë jashtë furre edhe për 30 minuta - 1 orë e më pas shërbejeni.
Kullojeni lëngun në tavë për të përgatitur lëngun e mishit si dhe qepët hiqini mënjanë.
Ju bëftë mirë dhe GËZUAR VITIN E RI !!!
TË TJERA RECETA PËR VITIN E RI
RECETA ËMBËLSIRASH
