BAKLLAVA TURKE ME PETA TË GATSHME
Ne e kemi provuar me bakllavanë, simboli i ëmbël i festave të fundvitit e kemi mbetur të kënaqur. Përse të mos eksperimentojmë një menu krejtësisht turke për festa? Nuk është shumë e shëndetshme, por njëherë në vit ia vlen të sakrifikoni për t’i bërë qejfin vetes.
Përbërësit:
- 1 pako me petë për bakllava afërsisht 500gr në temperaturë ambienti (mjaftojnë 13/15 petë)
- 300 gr arra të qëruara dhe të ndara në thërrime të mëdha
- 200 gr gjalpë i tretur.
Për kremin ju nevojiten:
- 2 vezë
- 280 gr sheqer
- 100 gr gjalpë i tretur
- 300 ml pana
- 1 bustinë sodë për torta të ëmbla
Kurse shërbetin duhet ta përgatisni me 400 ml ujë ● 450 gr sheqer ● 1 lugë lëng limoni.
Përgatitja:
Përgatisim sherbetin duke përzier në një tenxhere sheqerin, ujin dhe lëngun e limonit. E lëmë të ziejë me flakë të mesme për 15 minuta pasi të ketë marrë valë. E lëmë mënjanë të ftohet.
Lyejmë tavën me gjalpë. Hapim petën e parë në tavolinë, palosim për 3 cm petën në anën më të shkurtër të saj, vëmë pak arra dhe e palosim petën sipër, vazhdojmë kështu duke e mbushur dhe duke e palosur për gjithë gjatësinë e petës, e vendosim në tavë dhe kështu vazhdojmë dhe me petët e tjera deri sa të mbushet tava. I spërkasim sipër me gjalpë.
Tava do të piqet me dy faza. E pjekim në furrën e ngrohur më parë me 180°C për 15 minuta ose derisa të shohim që ka marrë ngjyrë sipër.
Gjatë kësaj kohe përgatisim kremin që do t’i hedhim sipër duke përzier me rrahësin e vezëve me dorë: vezët me sheqerin, panën, gjalpin dhe sodën të cilën e shtojmë me sitë.
Pasi të kenë kaluar 15 minuta që e kemi vënë tavën në furrë, e nxjerrim nga furra, i hedhim kremin e përgatitur sipër dhe e vëmë të piqet edhe 15/20 minuta të tjera ose derisa të shohim që kremi është mpiksur.
Pasi ta kemi nxjerrë nga furra e lëmë të ftohet për 10 minuta dhe më pas i hedhim sherbetin e ftohtë që kishim lënë mënjanë. E lëmë të thithë sherbetin të paktën për 3-4 orë. Është më e mirë të nesërmen.
Ju bëftë mirë!