KREMI KATALAN

Kremi katalan

Përbërësit:

- 1 litër qumësht

- 150 gr sheqer

- 50 gr sheqer integral (ngjyrë kafe)

- 8 të verdha vezësh

- 20 gr miell

- 1 copë kanellë

- lëkuren e një limoni

Përgatitja:

Hedhim qumështin në një tenxhere bashkë me lëkuren e limonit dhe copën e kanellës duke lënë një gotë mënjanë.

E çojmë drejt vlimit dhe sapo të marrë valë, fikim zjarrin.

E lëmë të pushojë për disa minuta me kapak të mbyllur ndërkohë që në një tas rrahim me ndihmën e një mikseri të verdhat e vezëve me sheqerin derisa të përftojmë një masë të fryrë dhe me ngjyrë të hapur.

Eleminojmë lëkurën e limonit dhe kanellën nga qumështi dhe shtojmë pak nga pak kremin e vezëve me sheqerin duke e përzierë mirë. Së fundi, shtojmë edhe gotën e qumeshtit të ftohtë (që kishim hequr mënjanë) në të cilën kemi tretur miellin.

E vendosim të gjithë përbërjen në zjarr të ulët duke e përzierë gjatë të gjithë kohës derisa kremi të trashet.

E ndajmë nëpër 6 tasa të cilat mund të futen edhe në furrë (porcelani) dhe e lëmë në temperaturë ambjenti derisa të ftohen plotësisht. Pas kësaj, i vendosim në frigorifer për rreth 2 orë.

Në momentin e servirjes, i spërkasim me pak sheqer integral dhe i vendosim në pjesën e sipërme të furres me nxehtësi maksimale derisa sheqeri të karamelizohet. Ky është momenti më delikat, pasi kremi duhet të mbetet i ftohtë brenda.

Për këtë arsye, i vendosim tasat e porcelanit brenda një tave qelqi me ujë të akullt dhe vazhdojmë me proçedurën si më siper.

Ju bëftë mirë!